ادري بالقَدَر أَصبح

بيني حايل او بينك

واعذرك لو گلت يبني

السهم متفرس ابعينك

ابيا چف يبني تدفّني

وگطعو ادري چفّينك

اعذرك أنه لو ما جيت

وِفِيت ابدمك الدينك

من خُمدت انفاسك

وصاب العَمَد راسك

لا مو سَهل

يا بالفضل

يا ريتك عدل وتشوف

يا عباس حال أُمّك

عن السانها ما طاح

الأخير أنفَاسها أسمك

وعن اعيونها ما غاب

لحظه يلولد رسمك

ابكل شدّه يبو فاضل

تِنِدبك هيّه وتحشمك

مشدوها أَفكاري

وحشه بگت داري

ما تنحمل

يا بالفضل

على اجبين الدهر كتبت

عهدها ابدم ضحاياها

للزهره وعلي وحسين

ما گصّرت حاشاها

هاي ام البنين الّي

ما خاب التعنّاها

چريمه وباسطه الچفين

واِتوافي الوفه اوياها

حلّفها بالچفين

وبنحر ابنها حسين

كل هم يفل

يا بالفضل