كيم ابو طالب كوروب اولدى بكام
كورمامش چون اوغلونه بكزر غلام
مادرى ايتدى اكا يابو الولد
والدم آدينى قويدم بن اسد
سويلدى اولدمده نوزاد ولى
بنده قويدم اوغلومك آدين على
كلديلر هپ اقربا وآشنا
قيلديلر تبريك نوزادى ادا
بيت ايچنده مقدمينى خير فال
ايتديلر بو بحثه دائر قيل وقال
قيلمدى رغبت برين ثدياننه
ره اولور دست ايله واران ياننه
ايلدى تشريف محمّد مصطفى
آلدى نوزادى قوجاغه پسر وفا
ديدى اكا مرحبا خير الولد
مرحبا بن فاطمه بنت الأسد
مرحبا اى نور پاك نو ظهور
مرحبا اى ساقى جام طهور
مرحبا اى سلسله ساز علا
مرحبا اى پايه اراى ولا
كورمدى امثالنى چشم سلف
بويله عالى منزلت خير الخلف