بِسمِ اللهِ الرّحمنِ الرّحيم
توحيد باري تعالى جلّ شأنه
وجودك او لمسه يا رب موجود |
|
وجوده كلمز ايدى بونجه مشهود |
سنك وارليغنه اشيا مظاهر |
|
بو اشيا وارليغني ايتدي ظاهر |
كتوردك آدمى يوقدن وجوده |
|
سزاوار ايلدك رسم سجوده |
بو صورتله ايدوب حقنده تكريم |
|
قلندى درس اسما صكره تعليم |
ويروب هر فردينه بر قابليت |
|
كيمى نور مجسم كيمى ظلمت |
دوشوردك فرقه يه بونجه عبادى |
|
ينه سن سك عمومك هپ مرادى |
تجلى صورتيدر اختلافات |
|
كوريله كندى فعليله مجازات |
ازلدن ليلمش سك بويله فرمان |
|
بونك غيري ظهوره وارمى امكان |
يارادان كائناتى سنسك الحق |
|
كه ذاتكدر همان فعّال مطلق |
مناجات بدرگاه قاضى الحاجات جلّ جلاله
بس شبانگاه كه ايروب لطف خداوند عليم
اولدى بيدار او دم ناطقه طبع اليم
اولدي جسم نه عجب طور تجلاى صفا
باشلدي عرض مناجاته كوكل مثل كليم
ديدى اى خالق بيچون عظيم الشانم
نه وجوه ايله ايده م شانكه لايق تعظيم