ماجت كل أرض بغداد من گوّض شديد الباس

وبچتله استقر هارون وستافت بني العباس

ما يدري اشجره اسليمان بس يسمع ضجيج الناس

گالوله او شهر سيفه او صال او طشر اللّمه

او خله اعليه المنادي ينادي والدمع ساجم

هذا الطيّب الماصوف وبن الطيب الكاظم

خلّه الوادم اتشيله او شالت نعشه الوادم

والشيعه اطلعت تبچي او كلها ابنحره اتشمّه

گام أو غسّله اسليمان بيده او يسچب العبرة

او خلف اجنازته اتحفه او شگ زيچه او حفر گبره

او من هال التراب اعليه حن گلبه وجذب حسره

او سوه الماتم ابداره او هل دمعه اعلى بن عمه

عاده او جرت عند الناس حين اللي يموت إنسان

كل إخوته ايشيلونه او لا يبگه على التربان

هم ميت ثلث تيام شفتوا يضل بلايه اچفان

بس ابلا چفن مطروح بالطف ضل ابو اليمّه

تهابه الوحش أن تدنو لمصرعه

وقد أقامَ ثلاثاً غير مقبور